Tscha, de Weltmeistershaft Nengteihnhunnertveerunföfftig häbt wi nu al lan´n achter uns un man weer je ok froh un stolz dat Düütschland na denn Kriech gliecks wedder een Footballmannschaft harr un dat wie ok gliecks Footballweltmeister worn sünd. De Ungarn häbt uns Mannschaft swoor to schaffen maakt, aber wi häbt dat Speel nu mal dank „Helmut Rahn“ wunn. Ja, ja wi häbt all´ de Dumm´ drückt damit uns Mannschaft gewinnt. All de Lüe de al to Huus een Fernseher harrn kun´n nu ok to Huus Foutball kieken- dat weer je ganz wat nieget un modernes. Wi harrn, wie veele annere to düsse Tied, to Huus noch keen Stubenkino. Wi dörften denn bi „Tante-Alma“ Foutball kieken; se harr een Cafe` in de Strannallee gliecks neben de Shell-Tanksteed un dor häbt sik ok all de annern, de noch keen Fernsehn harrn, to´n Foutball kieken infunn´. Dat weer di vielicht een Beleev, dat kann ik ju sänn. Wi Kinner dörpen vörn op denn Footboben sitten un de ölleren säten un stün´n achter uns. Un als dat Speel to en´d weer, sünd in uns Footballverein VfL-Haffkrooch gliecks mier Footballers registriert worn. Dat günn je alln´s flink vörran un een jeden wull op eenmal Football speelen un wi Kinner ers recht. Football häbt wi Kinner al jümmers speelt, op denn Parkplatz gliecks neben denn Fischschuppen. Footballschou harrn wi nich, wi häbt denn mit uns Schoo oder ok Gummistebel, de wi graad anharrn, speelt, un een richtigen Ball weer ok nich to hämm, över mit sun opgeblasene Swiensblaas günn dat ok, se höll blood nich so lann. Als Duur häbt wi uns veer ole Fischkissen ut denn Fischschuppen hollt.
 
Twee Johr laater, gaht wi eens Daags mit een poor Schoolfrönd dörch uns Dörpstraat an denn Wischen-wech vörbi na denn Waldwech rin. Als wi denn an´n unsen niegen Footballplatz, de je eers ganz nie buud worn is, vörbi kommt, sä een vun uns, dat is over een fein Footballplatz, hier könnt wi nu olli bolzen un denn günn dat ok gliecks los, denn gannnn…zen Dach.
 
Ja, un dat duer ok nich lann´-Nengteihnhunnertsöbenunföffti sünd wi Kinner denn anfunn´, een Schöler-mannschaft to grün´n.
 
 
All´ mine Naversfrünn´d un Schoolkollegen weern gliecks dorbi: Heinz Sch., Manfred Kr., Martin B., Ernst Fr., Uwe Sch., Joachim H., Rolf B., Hans-Werner St., Udo M., Hans-Georg B., Carsten S., Henning G., Günther V., Norbert B. un ik. Un ut Sierksdörp weern Bodo W., Henner E. un Oswald Schm. dorbi.
 
Wi sünd denn mit dree Mann na Walter Beckmann in de Baahnhofstraat hengahn, de hät jümmers de Trikots vör denn VfL-Haffkrooch wuschen- he harr nämli een Wäscherie un he weer ok Bigeordneten bi denn VfL in´n Vörstand. Denn häbt wi fraacht bi wenn wi uns mel´n möt, wenn wi een Schöler-Mannschaft grün´n wöllt. „Ju möt na denn Vörsittenden gahn, dat is Wilhelm Doorndörp de Kröger vun dat Gasthuus to Post und denn möt ju frougen“, sä he. Dat häbt wi ok makt un denn müssen wi över noch aftöven, dat hät denn noch ollig beten duert, bet se sik in denn Vörstand vun´n VfL ennig weern un denn weer dat sowiet. Wi harrn je allang föfftein Mann tosomm´ un uns Trainer, dat weer Hans Roloff. Siene Öllern harrn glieks neben dat Cafe´Tante Alma een Obst un Gemüsegeschäft. He hät uns denn trainiert, dat kann ik ju sänn´, dat hät di över een lütt beten Spouß makt. Nu müssen wi öber noch allemann Trikots hämm´ un Foutballschou, dat weer ok noch je nich so eenfach, denn veele Öllern harrn je ok nich soveel Geld för de Kinner eenfach so Foutballschou to köpen. Een poor Mann häbt denn noch in Turnschou speelt. An Trikos wör noch gornich to denken, de kämm´ eers een Johr laater. Un wenn wi een Utwärtz-speel harrn, sünd wi mit Hans Roloff sien Gemüse-Transporter 2,5 t Opel-Blitz föhrt. De Lastwagen föhr ok mit Flüssiggas un wi säten achter op de Ladefläche mit so een Plaan över, dat weer een heidenspouß. Wi dörpen uns je nich rögen, wenn de „Grönen“ uns anholln dön´n, denn kost´ dat ok sun´n lütt beten Straaf un dat wull je ok keen.
 
Bi dat eerste Speel, ik glööv dat weer gegen Pansdörp, kregen wi je ollig de Huck´ vull. Naja, wie müssen uns ok eben inspeeln un dat weer je ok nich so eenfach. Öber wi weern jümmers beter un beter, un so langsam weern wi ok inspeelt, un twee Johr wieder, dor sünd wi je ok opstegen. Ja-ja, wi harrn denn al denn sössten un föfften Platz in de Kreisliga. Dat weer al ganz goot un unsen Trainer Hans Roloff weer ok ganz stolz op uns. Un dorna sünd wi denn ok noch Kreismeister worn: man, wat weern wie stolz, dat kann ik ju sänn´- un dat wör denn bi Hans Wicekowski in denn Krooch „To Rüüs“ neeben denn Haffkröger-Hoff ollig fiert. Ja-ja in Haffkrooch weer to düsse Tied ollig wat los un all harrn se dörch de Weltmeisterschaft denn Footballsplien in´n Kopp.
 
Lütt vertell´n vun Martin Meier, Haffkroog-Oostsee. Die plattdeutsche Schreibweise wurde dem gesprochenen Holsteiner Plattdeutsch im weitesten Sinne angepasst.